Konsepto ng pagiging lalaki at pagiging babae mula sa pananaw ng mga batang Pilipino

• Main Authors: Ebora, Shalee, Miranda, Cristina, Vagilidad, Rexy
• Format: text
• Language: Filipino
• Published: Animo Repository 1995
• Subjects: Perception; Masculinity (Psychology); Femininity (Psychology); Sex (Psychology); Children, Filipino
• Online Access: https://animorepository.dlsu.edu.ph/etd_bachelors/9542
• Institution: De La Salle University

Ang pag-aaral na ito ay napapatungkol sa konsepto ng pagiging lalaki at pagiging babae ng mga 5-6 na taong mga batang Pilipinong lalaki at babae na naninirahan sa Paranaque at Pulilan. Ang pagkakapareho at pagkakaiba sa konsepto ng pagiging lalaki at pagiging babae ayon sa dalawang baryabol na ito ay tiningnan din. Ang mga napiling lugar na pagdarausan ng pag-aaral ay sa Pulilan, Bulacan at Parañaque. Ang metodong ginamit ay ang pagpapaguhit sa mga bata ng hitsura (buhok at damit) at gawaing panloob at panlabas ng bahay ng kanilang mga ate, nanay, lola, kuya, tatay, at lolo, upang masukat ang pagiging lalaki at pagiging babae ng mga ito. Ginamitan rin ang mga kalahok ng pagtatanong tungkol sa mga naidrowing-nila upang malaman kung ano nga ba talaga ang konsepto nila sa mga ito. Batay sa mga resultang nakalap sa pamamagitan ng paggamit ng content analysis, napag-alaman ng mga mananaliksik na ang konsepto ng mga bata sa pagiging lalaki at pagiging babae ay batay sa kanilang mga karanasan sa pakikisalamuha at obserbasyon sa kanilang pamilya, kamag-anak at ibang tao, at may impluwensiya rin ang pagpapalaki sa kanila, at maging ang lumalaganap na modernisasyon, na nakalap mula sa pagtatanong sa mga kalahok na bata. Napag-alaman rin na halos walang pagkakaiba ang konsepto ng pagiging lalaki at pagiging babae ng mga batang lalaki at babae at naninirahan sa Paranaque at Pulilan. Ang konsepto ng pagiging babae ng ate, nanay at lola ayon sa buhok ay maaaring mahaba at maigsi sa lahat ng yugto, sa kalalakihan naman ay laging maigsi lamang dapat. Ang konsepto ng mga bata sa damit ng ate at nanay ay pareho ngunit ang sa lola ay mas konserbatibo at kumbensyonal pa rin na palda't bestida. Ang konsepto naman ng mga bata sa pananamit ng kalalakihan ay pare-pareho (pantalon at shorts) lamang ngunit pinakamadalas mag-shorts ang kuya sa tatlo. Sa gawain, pare-pareho lamang ang gawain ng kababaihan sa bahay, ngunit ang pinakamarami ang sa nanay. Ang mga kalalakihan ay mas madalas magluto kaysa ano pa mang gawaing-bahay. Ang kuya ay nag-aaral dapat samantalang ang ama ay nagtatrabaho, at ang lolo ay namamahinga na lamang. Ang konsepto naman ng mga bata sa katangian ng mga kababaihan ay ang pagiging matulungin ng ate, mapag-alaga ng nanay at mapagpahinga't makaluma ng lola. Ang katangian ng mga kalalakihan ay ang pagiging makauso ni kuya, pagkamasipag ni tatay at pagkahina ng lolo.