Biyaheng tricycle : pagkilala sa mga heritage site at pagkain bilang sagisag kultura ng lungsod ng Malabon

• Main Author: Reyes, Mary Grace S.
• Format: text
• Published: Animo Repository 2016
• Subjects: Historic sites > Philippines > Malabon; Food habits > Philippines > Malabon; Tourism > Malabon > Philippines
• Online Access: https://animorepository.dlsu.edu.ph/etd_bachelors/2856
• Institution: De La Salle University

Naikabit na sa lungsod ng Malabon ang mga negatibong impresyon kagaya ng pagiging bahain nito. Mas tumatak na sa mga tao ang pagkakakilanlan na ito kaysa sa itinataglay nitong magaganda at maipagmamalaking katangian. Kasabay nito, minimithi rin ng pamahalaang Malabon na iwaksi ang mga ito at paunlarin ang imahe at pagkakakinlanlan nito sa tulong ng mga tinataglay nitong katangian. Upang maisagawa ito, patuloy ang pagsasaayos ng kanilang lugar at proyektong pang-imprastruktura. Ngunit, hindi nagtatapos ang kanilang hakbangin sa pagsasaayos lamang ng kanilang lugar. Kanila ring sinasaayos ang proyektong panturismo upang mas makilala ang Malabon dahil sa mga lugar at produktong matatagpuan dito. Ligid sa kaalaman ng nakararami na kinakatatampukan ito ng maipagmamalaking mga heritage site at pagkain. Sa magkasabay na panahon nitong pag-usbong, ang dalawang aspektong ito ang nagsilbing namamayaning kultura at katangian sa lungsod ng Malabon. Sa kanila ng ilang dekadang paglipas, kapansin-pansin na nananatili at napapangalagaan pa rin ang mga ito. Sa paglulunsad ng pamahalaang lungsod ng proyektong Tricycle Tours, nailalahad nito sa mga tao ang namamayaning kultura sa lungsod-- amg mga heriritage site at pagkain. Ninanais nitong ipakilala sa mga tao naitatagong kayamanan ng Malabon na nakatutulong mapaunlad at mapagtibay ang imahe at pagkakakilanlan nito. Nakadaragdag ito sa patuloy na pagsubok ng pamahalaan na iwaksi ang mga ngatibong impresyon naiuugnay sa lungsod at manatili sa kaisipan ng mga tao ang mga maipagmamalaking mga lugar, pagkain, at produkto. Sinisikap ng lungsod na maipakita ang tunay na kagandahan ng lugar kasabay ng pagpapakita ng hospitalidad at kabaitan ng mamamayan nito. Ang proyektong ito ang naging daan upang mapagtagumpayan ng Malabon ang minimithi nitong identidad at imahe sa mga tao. Para sa pag-aaral nito, susuriin ng mananaliksik ang proyektong Tricycle Tours at ang pagiging tulay nito sa pagsasanib ng namamayaning kultura sa lungsod ng Malabon. Upang maisakatuparan ito, nagsaliksik ng mga kaugnay na artikulo patungkol sa lungsod ng Malabon. Gumamit din ng pakikipanayam sa pamahalaang lungsod at ilang tauhan ng Tourism Office upang makakalap ng karagdagang datos at impormasyon para sa ikalalalim ng pagsusuri. Sinubok din ng mananaliksik ang proyektong Tricycle Tours upang masuri ang bawat destinasyon at maugat ang kaugnayan nito sa pagkakakilanlan ng lungsod. Susuriin din ang ambag nito upang mapagtibay ang pagkakakilanlan at imahe ng lungsod kasabay ng pagwawaksi ng negatibong impresyon na naiugnay na rito. Sa pagtatapos ng pananaliksik na ito, natuklasan na patuloy na napagtatagumpayan ng proyektong Tricycle Tours ang layunin nitong makatulong sa hanapbuhay ng mamamayan ng lungsod at maitatag ang makabagong pagkakakilanlan at imahe ng Malabon, Napatunayan na naging tulay ang proyektong ito sa pagsasanib ng dalawang namayaning kultura sa Malabon na naging daan upang mabago ang impresyon ng mga tao rito at mapaunlad ang naitatag na imahe at identidad ng lungsod. Minimithi ng manaliksik na para sa susunod na pag-aaral na maipagpatuloy pa ang pananaliksik patungkol sa lungsod ng Malabon. Mahalaga na mapa-igting ang mga pag-aaral na may kinalaman sa nasabing lungsod sapagkat makatulong ito sa pagpapalawak ng kaalaman dito at sa pagpapatatag ng identidad at imahe ng Malabon.