Aba komodipikasyong Maria: Ang simbahan ng Simala, Cebu bilang espasyo ng turismong pangkultura

• Main Author: Santos, Mary Veronica P.
• Format: text
• Language: Filipino
• Published: Animo Repository 2016
• Subjects: Miracles > Philippines > Cebu City; Tourism > Philippines > Cebu City; Culture; Communication
• Online Access: https://animorepository.dlsu.edu.ph/etd_bachelors/2873
• Institution: De La Salle University

Ang pag-aaral na ito ay sumusuri sa pagtatagpo ng espasyo ng pananampalataya at komersyo na siyang bumubuo bilang espasyo ng turismong pangkultura sa simbahan ng Simala. Matatagpuan ang simbahan ng Simala sa Timog na bahagi ng Cebu. Kilala ito dahil sa mga milagro 'di umano ng imahen ng Our Lady of Fatima nang lumuha ito at ipagtanggol ang bayan ng Sibonga nang magkaroon ng epidemiko nong 1986. Dahil sa mga kuwentong ito, marami ang naging deboto ng simbahan na kinalaunan ay naging daan upang maitayo ang simbahan sa pangangasiwa ng Marian Monks Eucharistic Adoration (MMEA). Maliban sa naging espasyo ng pananampalataya ang simbahan ng Simala, naging espasyo na rin itong turisong pangkultuta dahil na rin sa naging pagda[g]sa ng mga dumarayo rito. Gamit ang teorya ni Melani Smith na postmodern cultural tourism, sinuri ng mananaliksik ang mga naratibo ng mga lokal at banyagang turista na dumarayo sa simbahan ng Simala. Dahil malaking bahagi rin ng simbahan ang himala, nagbigay ng mananaliksik ng iba't ibang mga tema at pagpapakahulugan ng himala na makikita sa simbahan ng Simala ayon sa panayam sa mga bisita at/o deboto ng simbahan. Maliban dito, tinukoy din ng mananaliksik ang mga kulturang umusbong sa simbahan ng Simala na nagpapaigting sa pananampalataya sa imahen ng Our Lady of Fatima gamit ang pagsusuri ng imahen ni Saussure. Gumamit din ng pagmamapa ang mananaliksik upang matukoy ang pisikal at kultural na espasyo ng simbahan sa pamamagitan ng paghahati nito sa tatlong parte: ang exterior ng simbahan, ang una, at ikalawang palapag ng interior ng simbahan. Base sa naging pagsusuring mananaliksik, nabuo ang espasyo ng turismong pangkultura sa simbahan dahil mayroon itong espasyo ng komersyalismo, pagninilay, at aliw. Maliban dito, sinuri din ng mananaliksik ang iba't ibang mga komoditi sa simbahan. Ilan sa mga produkto nito ay ang pagpapamisa, pagsusulat ng petisyon, pagbebenta ng langis, at mga souvenir. Dahil nakitaan ng oportunidad ng mga lokal ang umuusbong na industriya ng turismo sa lugar, nagtayo na ng iba't ibang mga negosyo upang makapaghanapbuhay. Sa dulo ng pananaliksik, tinalakay ng mananaliksik na ang kabuuan ng pananampalataya sa simbahan ng Simala ay nakadepende sa salapi o pagbili ng mga turista na nagmumula sa pagpunta sa simbahan hanggang sa kanilang pansariling pananampalataya. Sa katotohanan lamang, nabibigyang-katapat ng salapi ang kanilang pagpapakahulugan sa pananampalataya dahil na rin sa pagkokomodipika ng mga kuwento ng himala mula sa Our Lady of Fatima. Sa madaling salita, handang maglabas ang mga bumibisita ng pera upang mas mapaigting nila ang kanilang pananampalataya.