Sipat-suri sa aksyon sa radyo ni Russel Gulfo ayon sa lenteng kritikal diskors analisis (KDA) ni Norman Fairclough

• Main Authors: Vermudo, Lorraine Angela F., Fairclough, Norman
• Format: text
• Language: Filipino
• Published: Animo Repository 2017
• Subjects: Russel Gulfo; Aksyon sa Radyo (Radio program); Radio programs > Philippines; Filipino language > Discourse analysis; South and Southeast Asian Languages and Societies
• Online Access: https://animorepository.dlsu.edu.ph/etd_bachelors/14958
• Institution: De La Salle University

Sa pag-aaral na ito binigyang-pokus ang sikat na programang Aksyon sa Radyo na pinangungunahan ng anchor na si Russel Gulfo ng istasyong 92.3 News FM. Napili ng mananaliksik ang paksang ito dahil ang ASR ang isa sa mga nangungunang programang panradyo sa Pilipinas na tinututukan ng maraming Pilipino lalong-lalo na ang mga motorista. Ginamit sa tesis na ito ang teorya ni Norman Fairclough na kritikal Diskors Analisis. Binigyan linaw dito kung pano nabuo ang konsepto ng hustisya sa Aksyon sa Radyo. Sa tesis na ito, sinuri ang kabuuan ng diskurso ng hustisya sa pagitan ng nagrereklamo at ng anchor. Tiningnan ang klase ng lenggwahe na kanilang ginamit at kung may epekto ba ito sa pagkamit ng hustisya sa programa. Sa tulong ng three dimensional framework ni Fairclough, naisagawa ng mananaliksik nang maayos nang KDA at nasagot ang pangkalahatang suliranin ng pag-aaral na Paano mailalarawan ang diskurso ng hustisya sa midya partikular ang teksto, proseso, at panlipunang implikasyon ng Aksyon sa Radyo? Sa proseso ng pagsasagawa ng KDA, nagrekord muna ng limang episode ang mananaliksik upang maging kanyang pangunahing datos. Sunod, trinanskrayb niya ito isa-isa gamit ang transcription system ni Jefferson (1979) na nirebisa ni Van Dijk (1997). Upang gawin ang unang dimensyon ng freywork ni Fairclough (text analisis), kinuha mula sa transkrip ang mga salitang ginamit ng nagrereklamo upang ilarawan ang kawalan ng hustisya at ang mga salitang ginamit ng anchors upang itaguyod o i-advocate ang hustisya. Tiningnan na rin ang mga sinabi ng ahensya ng gobyerno pati ng nagrereklamo upang tingnan kung consistent ba ito sa isa't isa. Mula dito, napag-alaman ng mananaliksik na iba-iba ang paraan ng mga nagrereklamo sa paglalarawan ng kawalan ng hustisya dahil na rin iba-iba ang kaso o sitwasyon na kanilang inirereklamo. Sa ikalawang dimensyon, ang process analisis, nakita kung paano lumahok sa diskurso ng hustisya ang nagrereklamo at ang anchor. Tiningnan ang katangian ng kanilang pagsasalita, pati na rin ang dalas nito. Dito napag-alaman na ang midya o anchors ang kumain ng pinakamalaking espasyo sa diskurso na may 50% ng kabuuan. Sa katangian nakita na mayroong pagkakaiba at pagkakahalintulad ang dalawang kalahok ngunit dumepende rin ito sa klase ng kaso na kanilang inihapag. Sa huling dimensyon isinagawa ang social analysis na nagpakita ng implikasyon ng diskurso ng husisya sa personal na sitwasyon ng nagrereklamo, sektor ng mass midya, at sa lipunang Pilipino. Laman din nito ang personal na insights ng mananaliksik ukol sa diskurso ng hustisya ngunit nakabase pa rin ito sa mga nakuha nyang datos.Makabuluhan ang pag-aaral na ito dahil nagsisilbi ito bilang panimulang hakbang lalo na't wala pang ibang isinagawang pag-aaral sa bansa kaugnay sa diskurso ng hustisya sa programang panradyo."