Pag-aaral sa mga problemang pangrelasyon ng mag-asawa dulot ng mga pagbabago sa tungkulin at sa relasyon sanhi ng penomenong OCW ayon sa mga asawang babae

• Main Authors: Abrilla, Bernadette, Guevarra, Shella, Hernandez, Ma. Fe
• Format: text
• Language: Filipino
• Published: Animo Repository 1996
• Subjects: Husband and wife; Overseas workers; Filipinos in foreign countries > Employment; Married people; Married women; Interpersonal relations; Wives > Effect of husband's employment on
• Online Access: https://animorepository.dlsu.edu.ph/etd_bachelors/7407
• Institution: De La Salle University

Sa mga nagdaang mga taon ay marami nang epektong naidulot ang penomenong OCW sa ating bansa. Ang pag-aaral na ito ay ginawa upang tingnan ang isa pang dulot ng penomenong ito sa pamilyang Pilipino partikular na sa relasyong mag-asawa. Sinuri sa pag-aaral na ito ang mga problema sa relasyon ng mag-asawa na dulot ng mga pagbabago sa tungkulin at sa relasyon sanhi ng pagkakalayo ng mag-asawa sa isa't-isa. Gumamit ng eksploratibo-deskriptibong disenyo; ang eksploratibo ay ginamit upang matukoy ang mga problemang pang-relasyon na kinakaharap ng mag-asawa at ang paraan ng pagharap at paglutas nito, samantalang ang deskriptibo ay ginamit upang talakayin at ipaliwanag ang mga problema sa relasyong mag-asawa. Ang non-probability, purposive sampling at chain-referral sampling ay ginamit sa pagkalap ng 30 kalahok. Ang mga mananaliksik ay nakipagkuwentuhan sa 30 babae naninirahan sa Metro Manila na may asawang OCW na isang taon o higit pang naghahanapbuhay sa ibang bansa. Habang nakikipagkuwentuhan ay ipinapasok naman ng mananaliksik ang kanilang mga katanungan na base sa open-ended unstructured interview guide. Ang buong pakikipagkuwentuhan ay ini-rekord sa tape recorder. Sa pamamagitan ng cross-case analysis ay nakita ang mga pagbabago sa tungkulin ng mag-asawa tulad ng pagiging ama at ina, pagdedesiplina sa mga anak, paggawa ng desisyon at inaasahang tungkulin ng asawang babae sa asawang OCW. Ang pagbabago naman sa relasyong mag-asawa ay nakita sa pagbabago sa kanilang komunikasyon, pagsasama at sekswal na pagganap. Sa pamamagitan ng content analysis na ginawa ng mga mananaliksik sa mga kasagutang ibinigay ng mga kalahok ay nakabuo ng kategoryang nagkaklasifay ng mga positibo at negatibong epekto nararanasan ng mga kalahok mula ng magkalayo silang mag-asawa. Ang positibong epekto ay hinati sa tatlong kategorya: pag-angat ng kabuhayan, pansariling kaunlaran, at pagtibay ng relasyong mag-asawa Ang negatibong epekto ay hinati sa tatlong kategorya: pang-emosyonal, pampamilya, at problemang pangrelasyon. Bahagi ng negatibong epekto ng penomenong OCW sa mag-asawa ay ang mga problemang kinakaharap ng asawang babaeng naiwan. Ang mga problemang ito ay hinati sa tatlong kategorya: dulot ng ibang tao, problema sa pamilya, at problema sa pagsasama. Ang mga problemang ito ay hinarap at nilutas ng mga kalahok sa pamamagitan ng pagdaing sa pamilya o kaibigan, pagsabi sa asawa, pagdarasal at paglilibang.