Tarlac State University bilang espasyo at mekanismo ng multikulturalismo at pagsasabansa

• Main Author: Mendoza, Jeanette P.
• Format: text
• Language: Filipino
• Published: Animo Repository 2019
• Subjects: Multicultural education > Philippines; Education, Higher > Philippines; Tarlac State University; Bilingual, Multilingual, and Multicultural Education
• Online Access: https://animorepository.dlsu.edu.ph/etd_doctoral/1509
• Institution: De La Salle University

Ang Tarlac State University (TSU) bilang isang panlipunang sistema ay isang multikultural na espasyo dahil naging tagpuan ito ng iba‘t ibang etnolinggwistikong pangkat, pangunahin dito ang mga Ilokano, Kapampangan at Tagalog, at iba pang pangkat etniko. Naging batayang konsepto ng pag-aaral ang naunang pananaliksik nina Mendoza et al. (2018), napatunayang sa loob ng TSU ay mas maliwanag ang ethnic at self-stereotype image, gayundin ay mas mataas ang positivity index ng tatlong pangkat kumpara sa ginawang sarbey sa Gitna at Hilagang Luzon. Nilayon ng pananaliksik na maipakita ang mga pamamaraang ginagamit sa TSU sa pagpapabuti at pagpapalutang ng ugnayang etniko at nasyonalismo, gabay ang balangkas ng multikulturalismo ni F.P.A Demeterio (2009) at teorya ng ―imagined communities‖ ni Benedict Anderson (1991) at ang teorya ng industriyalisasyon ni Ernest Gellner (2003). Pinagsamang Kuwantitatibo at Kuwalitatibo ang ginamit na metodo, at sa pamamagitan ng sarbey at FGD mula sa mga kalahok na estudyante, mga guro at administrador ay nailahad ang mga kaukulang karanasan na mahahango sa TSU bilang mekanimso ng multikulturalismo tungo sa pagsasabansa. Sa pamamagitan ng mga mekanismong inilalaan ng TSU, kabilang rito ang mga polisiya at politika ng pamantasan, mga paniniwala, pag-uugali, at kaasalan ng bawat miyembro na bumubuo, mga estilo at estratehiya sa pagtuturo, mga counseling program, mga gawaing pangkomunidad/ekstensiyon, mga wika at diyalektong ginagamit at natatanging kultura at hidden curriculum ng TSU ay napatingkad at napabuti ang ugnayan ng bawat etnolinggwistikong pangkat maging ng kanilang konsepto sa lahing Filipino. Sa kabuuang pag-aaral, nailahad na ang TSU bilang isang espasyong multikultural ay kumikilala ito sa kaisipang multikulturalismo kaya sinisikap nitong magtaguyod ng mga programa at proyekto para sa iba‘t ibang etnolinggwistikong pangkat na may malalim na pagpapahalaga sa kanilang mga wika at kultura. At mula sa mga karanasang ito ay mahahango sa TSU ang mga aral at kabatiran na maaaring maging hulwaran ng iba pang multikultural na institusyon tungo sa ating pagsasabansa.