Tatlong mukha ng pamamantas-wika, isang talastasang pangwika: Diyalohikong pagbasa kina Bonifacio P. Sibayan, Ernesto A. Constantino, at Andrew B. Gonzalez, FSC sa lente ng hermeneutika ni Hans-Georg Gadamer

• Main Author: De Leon, Jay Israel B.
• Format: text
• Language: Filipino
• Published: Animo Repository 2022
• Subjects: Linguistics > Philippines; Language planning; Hermeneutics; Sibayan, Bonifacio P., 1916-; Constantino, Ernesto, 1930-; Gonzalez, Macario Diosdado Arnedo FSC, 1940-2006; Gonzalez, Andrew, 1940-2006
• Online Access: https://animorepository.dlsu.edu.ph/etdm_fil/11; https://animorepository.dlsu.edu.ph/cgi/viewcontent.cgi?article=1011&context=etdm_fil
• Institution: De La Salle University

Pinag-aralan sa papel na ito ang mga buhay at kaisipan ng tatlong Pilipinong lingguwista: Bonifacio P. Sibayan (1916-2005), Ernesto A. Constantino (1930-2016), at Andrew B. Gonzalez, FSC (1940-2006) sa lente ng pilosopikal na hermeneutika ni Hans-Georg Gadamer (1900-2002). Ipinalagay ni Gadamer na ang bawat isang inidibidwal ay may sariling “abot-tanaw” o ang saklaw ng kaniyang paningin mula sa isang partikular na punto de bista, kabilang na ang mga kaalaman, damdamin, at prehuwisyong lagi niyang bitbit sa anomang akto ng pag-uunawa. Ayon kay Gadamer, ang mga indibidwal na abot-tanaw ay may kakayahang magsanib sa isang diyalogo na ang layuni’y isang komung pag-unawa. Sang-ayon dito, tinangka ng pag-aaral na itong alamin ang saysay ng mga kaisipan ng isang Pilipinong lingguwista at basahin ito mula sa pananaw ng dalawa pang Pilipinong lingguwista. Nilayon ng pag-aaral na: 1) isalaysay ang pag-usbong nina Sibayan, Constantino, at Gonzalez sa pagiging lingguwista; 2) ilahad ang mga kaisipan ng tatlong lingguwista hinggil sa mga wika ng Pilipinas; 3) ilarawan ang mga pagkilos nina Sibayan, Constantino, at Gonzalez hinggil sa wikang panturo sa sistemang pang-edukasyon; at 4) tukuyin ang mga pagkakasundo at hindi pagkakasundo ng mga pananaw ng tatlong pantas mula sa diyalohikong pagbasa. Sa huli, ipinakita ng papel na sa kabila ng radikal na pagkakaiba-iba at mga hindi pagkakasundo ng tatlong lingguwista sa kanilang mga ideya, mayroon pa ring mga pagkakasundong mainam na tingnan at pahalagahan. Tinasa rin ang kanilang mga ideya sa konteksto ng mga kasalukuyang usaping pangwikang kinahaharap ng mga Pilipino na siyang nagpatunay sa kahalagahan at kabuluhan ng muling pagbubungkal sa kanilang mga kaisipan.