Sa pagkalagot ng hininga at sa pagtutungo sa kabilang buhay: Kamalayan, paniniwala at ritwal ng mga tagalog

• Main Author: Ubaldo, Lars Raymund Cortuna
• Format: text
• Published: Animo Repository 2008
• Subjects: Tagalog (Philippine people); Death > Philippines; Critical and Cultural Studies
• Online Access: https://animorepository.dlsu.edu.ph/faculty_research/12634
• Institution: De La Salle University

Ang papel pananaliksik na ito ay survey at pagsusuri sa kamalayan, kapaniwalaan at tradisyong Tagalog kaugnay ng huling yugtoo ng buhay tungo sa kamatayan. Magkaugnay ang mga ritwal sa pagpapagaling ng karamdaman, paghahanda sa kaluluwa ng mamamatay, paghahatid sa huling hantungan at pagtungo sa kabilang buhay sapagkat nakakabit ito sa kabuuang pagpapakahulugan sa pag-iral ng tao. Bilang halimbawa, lalapatan ng pagsusuri ang kamalayan sa likod ng ritwal sa paghahanda ng kaluluwa ng taong nasa bingit ng kamatayan na dating isinasagawa ng mga babaylan/katalonan ngunit nang lumaon ay nagbagong-anyo tulad ng ritwal ng "pahesus." Dagdag pa rito,pag-uukuan din ng pansin ang konsepto ng "marangal at magandang" kamatayan at maging ang mga nakapasok na paniniwala tulad ng huling paghuhukom at kaligtasan ng kaluluwa bukod sa iba pa. Para sa mga Tagalog, bunsod ng karanasang historikal, nagbagu-bago ang mga ritwal at paniniwalang ito. Ang kalakhan ng pagkakaiba ay may relihiyosong dimensiyon tulad ng lumilitaw sa paghahambing sa dating sistema ng kapaniwalaan at sa pagpasok ng Kristiyanismo bagama't mapapansing may mga pagtatagpo at pag-aangkop.Bilang batayan ng pag-aaral, makabuluhan ang pagtatala sa marami pang buhay na mga ritwal gayundin ang dokumentasyon ng mga materyal na patunay sa paniniwala (mga larawan, pinta, sementeryo bukod sa iba pa). Bukod dito, ang mga dokumentong historikal at mga nakalimbag na batis tulad ng mga aklat-dasalan, akdang pampanitikan ay malaking tulong sa pagsubaybay sa pagbabago at pagpapatuloy ng mayamang kapaniwalaan sa transisyon mula sa buhay patungong kamatayan.