Sistema ng Pamantayan ng mga Pilipino bilang Batayan ng Pagbuo ng Pasya ng mga Kumupkop sa mga Batang may Human Immunodeficiency Virus (HIV)

• Main Author: Fuentes, Faye N.
• Format: text
• Published: Animo Repository 2024
• Subjects: asal; diwa; desisyon; halag; sistema ng pamantayan; Social and Behavioral Sciences
• Online Access: https://animorepository.dlsu.edu.ph/malay/vol37/iss1/3; https://animorepository.dlsu.edu.ph/context/malay/article/1002/viewcontent/3fuentes_revised.pdf
• Institution: De La Salle University

Tutuon ang papel na ito sa pagtingin sa sistema ng pamantayan ng mga Pilipino (Filipino values system) ni Landa Jocano bilang pangunahing salik sa pagbuo ng mga itinuturing na komplikadong desisyon ng mga Pilipino. Ang pangunahing suliraning sasagutin sa papel na ito ay, paano nabubuo ang pagpapasya ng mga kumukupkop sa mga batang may Human Immunodeficiency Virus (HIV)? Sasagutin ito sa tulong ng mga sumusunod na tiyak na suliranin: 1.) Paano nabuo ang pamantayan ng mga kumupkop sa pagbibigay-halaga sa mga batang may Human Immunodeficiency Virus (HIV)? 2.) Ano-ano ang mga aspektong pangkaasalan ang nagtulak sa desisyong panatilihin ang pagkupkop sa mga bata, sa kabila ng pagkakaroon nila ng sakit? 3.) Paano hinarap ng mga kumupkop sa mga batang may Human Immunodeficiency Virus (HIV) ang mga hamon sa kanilang naging desisyon? Lumabas sa pag-aaral na mayroong mataas na pagpapahalaga sa bata, sa kamag-anak at sa kapuwa sa kabuuan ang mga kumupkop. Ipinakita ang pagpapahalagang ito sa elementong asal kung saan isinaalang- alang ang kanilang turing sa kapuwa at damdaming sumalamin sa kanilang pagiging marangal. Panghuli, ang mga ugnayan ng diwa sa budhi, kapalaran, bisa at “bahala na” ang nagsisilbing pangunahing ugat sa pagbuo ng kanilang desisyon. Sa kabuuan, masasabing ang mga Pilipino ay makatao, may pagpapahalaga sa pamilya at kapwa at hinubog ng kultura upang maging mas matibay dahil sa kanilang mga paniniwala at pananampalataya. Ang mga katangiang ito ay sumasalamin sa sistema ng pamantayan ng mga Pilipino (Filipino values system) na hindi namamalayang nagiging batayan ng mga desisyon ng mga Pilipino lalo na sa mga sitwasyong hindi pangkaraniwan gaya ng pagkupkop ng mga batang may HIV.