Human Gaze sa Telebisyon:Ang “Buhay-Iláng” Ayon sa Born to be Wild

• Main Author: Telles, Jason Paolo R.
• Format: text
• Published: Archīum Ateneo 2019
• Subjects: ekomidya; kritikal na pag-aaral sa mga hayop; human gaze; buhay iláng; infantilisasyon; obhektipikasyon; Born to be Wild
• Online Access: https://archium.ateneo.edu/katipunan/vol4/iss1/10; https://archium.ateneo.edu/context/katipunan/article/1095/viewcontent/Katipunan_204_202019_2010_20Mga_20Artikulo_20__20Telles.pdf
• Institution: Ateneo De Manila University

Itinatampok ng sanaysay na ito ang diskusyon kung papaano inilalarawan at isinasakatawan ng lingguhang programang dokumentaryo ng GMA Network na Born to be Wild ang mga buhay-iláng (wildlife) sa Pilipinas. Gamit ang konsepto ng “human gaze” ni Randy Malamud bilang lente, mapapansing ang mga pagsasalaysay (narrative), musika, at mise-en-scène ng mga episodyo ng nasabing programang pantelebisyon ay naghahayag ng “subalternidad” ng mga buhay-iláng. Sa ilalim ng representasyon na ito, inilarawan at isinakatawan ang mga buhay-iláng ayon sa mga tropo ng infantilisasyon (infantilization) at obhektipikasyon (objectification). Ang infantilisasyon ng mga buhay-iláng ay makikita sa pagturing sa kanila ng dokumentaryo bilang mga nilalang na kawawa (helpless), mahina, at walang kakayahang protektahan ang kanilang sarili laban sa mga maaari nilang maranasang suliranin. Napapasailalim din sa tropong ito ang pagturing sa mga tao bilang tagapagligtas at tagapagprotekta ng mga hayop dahil nga sa kahinaan at pagiging kawawa ng huli. Sa kabilang banda, ang obhektipikasyon naman ng mga buhay-iláng sa dokumentaryo ay may tatlong uri. Sila’y tinitingnan bilang mga: (1) tanawin (spectacle), (2) libangan (entertainment), at (3) pangangailangan ng tao. Nagpapahiwatig ang human gaze ng pagkiling ng programa sa antroposentrikong (anthropocentric) pananaw.