Historikong Pagbagtas ng mga Banyagang Impluwensiya sa Kontemporanyong P-pop

• Main Author: Velasco, Kirsten Louise G.
• Format: text
• Published: Archīum Ateneo 2025
• Subjects: P-pop; kasaysayang pangmadla; kasaysayang pangmusika; glokalisasyon; mga pamumuhunang transnasyonal
• Online Access: https://archium.ateneo.edu/katipunan/vol12/iss1/5; https://archium.ateneo.edu/context/katipunan/article/1108/viewcontent/Katipunan_2012.1_202024_20__20Velasco_20__20Historikong_20Pagbagtas_20ng_20mga_20Banyagang_20Impluwensiya_20sa_20Kontemporanyong_20P_pop.pdf
• Institution: Ateneo De Manila University

Maaring makita ang kontemporanyong industriya ng P-pop na umusbong sa mga nagdaang taon bilang bahagyang produkto ng mga katumbas nitong genreng banyaga, partikular na ang J-pop at K-pop ng mga bansang Japan at South Korea. Maraming aspekto ng industriya ng P-pop, tulad na lamang ng konsepto nito ng “idol,” sistema nito sa pagbubuo ng mga idolo, at pamamaraan nito ng pagmarket sa mga idolo, ang pare-parehong nakuha sa nabanggit na mga banyagang industriya. Ito ay ginawa sa pagnanais na makabuo at makapamahala ang bansa ng sarili nitong “idol industry.” Sa katunayan din, ang pagsisimula ng P-pop ay maaring maiugat sa Kanluraning penomena ng mga boy band at girl group na umusbong noong simula ng ika-21 siglo; naging impluwensiya ang mga ito sa pamumuhunan ng mga Filipinong kompanya sa sarili rin nilang mga grupo. Dito umusbong ang SexBomb Girls at Viva Hot Babes, sa panahong binabansagan kong “pre-P-pop,” na isa namang panahong napahinto pagsapit ng dekada 2010 sapagkat hindi naipagpatuloy ng mga grupong Pop Girls at XLR8 ang tagumpay ng naunang mga pangkat. Ganap na nagbago ang industriya nang mamuhunan ang Japan, sa pamamgitan ng MNL48, at South Korea, sa pamamagitan ng SB19, sa idol industry sa bansa. Binabagtas ng pagaaral ang kasaysayan ng P-pop mula sa pagbabago ng mga lokal na music act mula simpleng banda o grupo patungong “idols,” alinsabay sa pag-ampon ng lokal na industriya ng mga natatanging katangian ng idol system. Ginawang case study ang MNL48 at SB19 sa kung paano isinalin ang mga Hapon at Koreanong impluwensiya at pamamaraang pang-industriya sa lokal na konteksto. Bukod sa dalawang nabanggit, tinitingnan din ng papel ang iba pang pangkat P-pop na sumikat sa mga nagdaang taon, at ang mga ambag nila sa nagpapatuloy na proseso ng pagbabago ng genre.