Pagkukuwento ng ALAMAT: Ang Pagtatagpo ng Paglalakbay at Paggawa sa Genre na P-pop

• Main Author: Trinidad, Andrea Anne I.
• Format: text
• Published: Archīum Ateneo 2025
• Subjects: ALAMAT; paglalakbay; paggawa; OFW; migrasyon
• Online Access: https://archium.ateneo.edu/katipunan/vol12/iss1/10; https://archium.ateneo.edu/context/katipunan/article/1113/viewcontent/Katipunan_2012.1_202024_20__20Trinidad_20__20Pagkukuwento_20ng_20ALAMAT.pdf
• Institution: Ateneo De Manila University

Puhunan ng grupong ALAMAT ang pagsesentro ng kulturang Filipino sa kanilang pag-iral bilang isang P-pop boy group. Malay sa pananaw na nagpapatumal sa patuloy na kasikatan ng genre, isinasandig nila ang kanilang mga awitin at ang mga kaugnay nitong proyekto at pagtatanghal sa anumang maituturing na hayagang Filipino upang pabulaanan ang mga sabi-sabing panggagaya lang ang P-pop sa K-pop. Iniluwal ng konseptong marapat na umugat mula sa iba’t ibang lugar sa Pilipinas ang mga gaganap na miyembro, naging madali para sa ALAMAT na binubuo nina Taneo mula sa Kalinga, Mo mula sa Zambales, Jao mula sa Pampanga, Tomas mula sa Albay, R-Ji mula sa Eastern Samar, at Alas mula sa Davao City, na matugunan ang pangangailangang multilingguwal na ideal na kumakatawan sa Filipino bilang pambansang wika na sinasaklaw at pinaghahalo-halo ang gamit ng lahat ng wikang sinasalita sa Pilipinas. Bukod sa wika, interesanteng nahahabi rin ng ALAMAT sa kanilang mga inilalabas na proyekto ang kasalimuotan ng kategoryang “Filipino.” Sa pagsipat sa kanilang mga gawa, mababakas ang nagsasapin-saping artikulasyon ng pangkat hinggil sa Filipino na hindi lang binubuo ng pagkilala sa masisiglang katutubong pamayanan na may angking paniniwala at tradisyon, kundi isinasaalang-alang din ang kasalukuyang implikasyon ng mahabang kasaysayan ng pananakop lalo na sa usapin ng mailap na panlipunang mobilidad at mabuway na ekonomikong estado ng Pilipinas sa global na kalakaran. Layong maidiin kung paano nakikipangusap ang grupo sa magkaakibat na pangangailangan ng paglalakbay at paggawa sa kontekstong Filipino, gagalugarin ng papel ang naratibong alok ng awitin at music video na “ILY ILY”—hango sa katutubong awiting Hiligaynon na “Ili-Ili, Tulog Anay”—na hayagang iniuugnay ang penomenong OFW sa Kristiyanong naratibo ng Pasyon at tradisyon ng penitensiya. Gamit bilang lunsaran ang mga diskursong alok ng unang awitin, susubuking pagkawing-kawingin sa papel ang iba pang pakikisangkot ng ALAMAT sa paggalugad ng kasalimuotan ng paggawa mula sa pagtatampok ng pisikal na pagtatrabaho ng mga Manong sa America sa music video na “kasmala,” pagpapasilip ng pagkayod ng batang katawan sa “Say U Love Me,” hanggang sa pagamin ng totohanang pakikipagsapalaran ng mga miyembrong bumubuo sa pangkat sa awiting “Manila Dreams.”