Critical Hits, Now Playing: Isang Critical Discourse Analysis ng mga Piling Kanta sa “Kalye Hip-Hop” Playlist sa Spotify

• Main Authors: Banasihan, Lara Cassandra V., Borce, Jared Miguel F., Yap, Jan Gabrielle
• Format: text
• Published: Archīum Ateneo 2025
• Subjects: kalye; hip-hop; Spotify; critical discourse analysis; pag-iiba; gahum
• Online Access: https://archium.ateneo.edu/katipunan/vol12/iss1/13; https://archium.ateneo.edu/context/katipunan/article/1116/viewcontent/Katipunan_2012.1_202024_20__20Banasihan_2C_20Borce_2C_20Yap_20__20Critical_20Hits_2C_20Now_20Playing.pdf
• Institution: Ateneo De Manila University

Ang kalye hip-hop ay isang kontemporanyong terminong tumutukoy sa koleksiyon ng mga nangingibabaw ngunit magkakasalungat na naratibong nililikha ng mga Filipino hip-hop artists na inilulunan ang sarili sa isang malawak na “kalye.” Ang kalye hip-hop ay nagsisilbing sisidlan kung saan ang mga “kalye” artist ay gumagawa ng musika’t sining tungkol sa kanilang mga karanasan para sa isang madlang makikinig at malilibang dito. Nilalayon ng pananaliksik na itong itatag ang sitwasyon ng kalye bilang isang eksena at komunidad sa pamamagitan ng tatlong dimensiyon na balangkas ni Norman Fairclough sa critical discourse analysis gamit ang lirika ng dalawang piling kanta mula sa editoryal na playlist ng Spotify na nagngangalang “Kalye Hip-Hop.” Sa pamamagitan ng pagtalakay sa mga tema na may kaugnayan sa kalye, isinisiwalat ng mga piling teksto na ang kohesyon ay gumagana sa pagpili ng salita at balarila upang ilarawan at isakongkreto ang karanasan ng mga artista. Sa antas ng diskursibong praktika, makikita ang konsepto ng pag-iiba sa mga lirika ng dalawang kanta, lalo na kung papaano ipinahahayag ng mga mang-aawit/manunulat ang kanilang pagkakakilanlan kompara at laban sa kabilang pangkat. Sa antas naman ng praktikang sosyokultural, nabibigyan ng pansin ang gahum na nakapaloob sa lirika ng mga kanta, at kung papaanong hinuhugis ng nasabing mga awitin ang imahen ng “kalye” sa lipunan. Ang kaligiran ng mga artista ay isinama rin sa pag-aaral upang mabigyan ng mas malalim na konteksto ang kanilang mga sitwasyon. Ang mga natuklasan dito ay nakapagpapaliwanag sa kasalukuyang mga gawi na sumasalamin sa kung ano ang maaaring isaalang-alang ng mga tao na “kalye,” at kung paanong ang mga resultang pananaw na ito ay nagdaragdag sa patuloy na diskurso sa mismong konsepto o imahen ng gayong lokasyon.